ربنا يوقفلكم ولاد الحلال !!!

السلام عليكم ورحمة الله وبركاته

النهاردة كان أول أيام إمتحانات الصف السادس الإبتدائي ! وفي الحقيقة أنا مكنتش هعرف إن هوا دا اليوم التاريخي لولا إن أختي الصغيرة السنادي في سنة ستة عقبال عندكم ، المهم اللي مخليني أكتب النهاردة إنكم بكرة هتفتكروا إن اليوم دا من أسوأ الأيام اللي بتمر على الشعب ، وبكرة تعرفوا وتقولوا مصطفى قال .

بصوا أنا زهقت أتكلم عن المدارس والمدرسين والقرف دا كله ، النهاردة أنا هتكلم عن حاجة تانية خالص ألا وهي السادة المبجلين أولياء الأمور : ربنا يحرقكوا ارحموا أولادكم وارحموا البلد وارحمونا بقى .

باين إني منفعل شوية بس بجد مفيش حاجة أحسن من كده ممكن أعبر فيها عن اللي الموقف . إذا كان التعليم بايظ في البلد بسبب المدرسين اللي مبيشرحوش - دا إذا كانوا مؤهلين أصلاً لكده - وبعدين المدرسة اللي ملهاش اي لازمة ولا بتربي ولا بتعلم ... إلخ إلخ الكلام دا كله ... بس أنا من وجهة نظري إن اللي يستاهل الحرق أصلا هما الناس اللي في البيت اللي بتربي عيالهم على كل حاجة غلط .. وبعد ردح من الزمن يخرجلنا شوية بهايم يمشوا في الشوارع وتلاقيهم فكل حتة من شوارع للمصالح الحكومية .. لكل حتة .

برضوا عشان أوضح ايه اللي مخليني أقول كده - وليه دا يوم أسود في جبين البلد . جرب تروح عند مدرسة ابتدائي في أي مكان وأنت تشوف بنفسك مدى التخلف اللي وصلناله. أولياء الأمور يا جماعة بيتخانقوا مع المدرسة والمدرسين عشان يغششوا العيال .!! آه وربنا ،،، بعد كده بقى نيجي نسأل هو ليه موظفين الحكومة بيطلبوا الرشوة ،، هو ليه العربيات بتمشي مخالف بكل بجاحة ، مهو يا حضرات هي دي النتيجة الحتمية للي متعلم الغش من وهو لسه نغة.

من فضلك إذا كان ردك - بينك وبين نفسك - على كلامي ، طب وايه المشكلة مهي الطلبة كلها بتغش ، ميغشوا براحتهم ياعم ، إنت هتقفلها ليه ؟ من فضلك إن كان في نفسك حاجة من الكلام دا ، اقفل الصفحة دي حالاً لأنك بالنسبالي واحد من البهايم اللي مضيعين البلد ومضيعنا معاهم، اقفل الصفحة حالاً متخلنيش أشتم أكتر من كده ....

الجيل اللي يتعلم من وهو في ابتدائي إنه يغش ، وإن المدرسة دي ملهاش لازمة ، منا كده كده باخد دروس والدنيا زي الفل ، هو دا الجيل اللي هيخرج بعد كده عشان يمسك البلد ، والنتيجة الحتمية هي القرف اللي احنا شايفينه في الشوارع دا .

الغش مش حاجة سهلة يا جماعة ، وربنا مهو سهل أبداً ، اللي يتعلم إنه يقبل دلوقت الغش في المدرسة ، بكرة لما يخرج للمجتمع هيعمل أكتر من كده ، ومش هيبقى في رقيب ولا حسيب عليه.

الست اللي واقفة قدام المدرسة عشان ابنها أو بنتها بتمتحن وقاعدة تدعي : "ربنا يوقفلكم ولاد الحلال اللي يسهلوها عليكم" وطبعا دعوة باطل ، هي دي اللي المفروض تتحاسب قبل المدرسين وقبل المسؤلين عن التعليم . هي مفكرة إنها كده بتنفع ولادها مع إنها بتضرهم أكبر ضرر لو تعرف ، وفي الآخر برضو هتتسأل يوم القيامة عن ولادها ،، مش هتتعتقي يعني مش هتتعتقي ... النوعية دي من البني آدمين عايزين الحرق في ميدان عام واللي هيفضل من الشعب -إن فضل حد غيري يعني - يصب الجاز الأسود عليهم ، دا بعد ما يترجموا بالجزم القديمة .

أنا بطلت عموماً أروح عند المدرسة مع أختي من زمان ، أصلي كل ما أروح أتخانق مع البهايم دول أعمل ايه ، وبعدين إن ملقيتهمش ألاقي أختى طالعة تعيط ، مالك يا بنتي ؟ أصل المللسة خدت الورقة من قدامي وادتها لزميلتي عشان تنقل منها .
وتروح تشتكي يقلولك هنعمل تحقيق ونبقى نقولك على النتيجة ، وموت يا حمار !!!

وياريت كل دا بيجي بفايدة ، والله العيال اللي بيكتبولهم الإجابات على السبورة مبيعرفوش ينقلوا ، أصل المشكلة مش في الإجابة، المشكلة إنه مش عارف يكتب مهو مش بيتعلم من أصله.

يا جماعة التعليم دا هو السبيل الوحيد لخروجنا من البلاوي اللي إحنا فيها دي ، إن كنا مصرين إن الأجيال اللي بعدنا تتطلع بنفس المنظر اللي إحنا طالعين بيه ، وإن كان دا هيفضل حال التعليم من ابتدائي للجامعة ، يبقى انسوا التغيير في البلد دي ، البلد دي عايزة ناس متعلمة ومتربية وعارفة ربنا .

لحد كده وكفاية أنا زهقت.

الحكومة الإليكترونية ...1

السلام عليكم ورحمة الله وبركاته 


بعد ما خصلت امتحانات من أسبوعين تقريباً قلت أخلص ورق الجيش  وبما أني وحيد أمي وأبويا , وكده كده واخد اعفا من الخدمة العسكرية .

المهم اتصلت بوالدي وقلتله أنا عايز بطاقتك أنت وأمي وشهادات ميلاد العيلة كلها عشان أعمل قيد عائلي عشان بيطلبوه في منطقة التجنيد. 


جهزت ورقي ونزلت وللأمانة مكنتش متفائل لأن في تاريخ عيلتنا الطويل مفيش ورقة خلصت مع الحكومة في يوم واحد , زي ما "ممكن" يحصل من البني آدمين , ودا يرجع لأني مولود برة مصر , وأول ما موظف الحكومة يشم أني اتولدت برة يبحلق كده ويقول هات الواد دا نعذبه شوية , وكمان شويتين هياخدوني على الصحرا ويحطوا الصخرة فوق صدري ويقولولي: أكفرت بآلهتنا رع وبتاح , وأنا أصرخ لا لا , أنا مصري وأبويا مصري  لأ والمفاجآة إن أمي مصرية كمان ,و كمان شربت من نيلها - بس لسه معملتش تحليل البلهارسيا بصراحة- .. 
 

المهم أبويا جابلي الأوراق في ملف أصفر كده مكتوب عليه " سلطنة عمان - مسقط"  ابويا شايله بقاله أكتر من 8 سنين مش عارف محتفظ بيه ليه دا , زي ما يكون من بيشم فيه ريحة برة , المهم دا كان دافع تاني لعدم التفاؤل باليوم دا , عشان أنا نفسي هفتكر الورق بيخلص برة إزاي وهنا إزاي والواحد مش ناقص إحباط.


صورت الأوراق المطلوبة وروحت على مركز المعلومات في مصلحة الأحوال الشخصية . 

- أنا : سلام عليكم , أنا عايز استخرج قيد عائلي لو سمحتم !
-الموظفة: تجيب صور شهادات ميلاد العيلة كلها وصورة بطاقة الوالد والوالدة و صورة قسيمة الزواج بتاعهم.
- أنا: اتفضلي يا فندم .
- بصت في الورق كده :مظبوط مظبوط , معاك أصل القسيمة دي .
- أنا : أيوه (ياجاهز أنا ,,) .
- بصت فيها وقالت : قالت الورقة دي يا مزورة يا ملعوب فيها . 
- أنا ( في بلاهة واضحة للعيان و فاغر الفاه مشرئباً ,, شلولخ) : نعم , ازاي ؟.
  وبيني وبين نفسي : ايه دا , أكمن أنا مغشوش الأيام اللي فاتت دي كلها .... أبويا مش أبويا , وأمي مش أمي , وأنا مش أنا هيييييييييييه  .
- تاني للموظفة : ازاي يا مدام ؟!
- قالت : أصل اسم الزوج والزوجة مكتوب بقلم غير باقي القسيمة !!!..
- أنا : صلاة النبي "صلى الله عليه وسلم" , معلش يا مدام امسحيها فيا المرادي , باين المأذون كان عايق شوية .

-هي : لأ القسيمة دي متنفعش , روح استخرج قسيمة كمبيوتر من الساحة الشعبية.
- في سري : ساحة ,, وشعبية . استر يارب !


المهم سألت فين الساحة الشعبية دي , ووصلت الحمد لله للشباك ومكنش في حد واقف (الناس بطلت تتجوز باين - منكم لله ياللي في بالي عقدتوا البشر في الجواز ) , المهم لقيت موظف ولا أهو عسكري مش عارف بيقولوا عليهم ايه .


- أنا : السلام عليكم , لو سمحت عايز أخرج قسيمة زواج لوالدي ووالدتي . اتفضل الأصل أهو.

-الموظف: اسم االوالد ايه ؟
- في سري : طيب ما الاسم مكتوب عندك يابني آدم , أنا مش ناقص خنقة .
- أنا :اتفضل شهادة ميلاد الزوجة والزوج - كل البيانات عندك.


لعب في الكمبيوتر كده شوية , وأنا اصلا مش عارف هو شغال ولا لأ .. المهم قالي انه مش متسجل عندي - روح المصلحة تاني هاتلي استعلام عن قسيمة الزواج.

 مع إني مش فاهم أصلا ليه يرجعني تاني للمصلحة , منا جاي منها أصلا ..
المهم رجعت وأمري لله.

- أنا : االسلام عليكم , لو سمحتم في الساحة الشعبية مش لاقين البيانات عندهم , وقالي هات استعلام من المصلحة تاني . 
- موظف عجيب : هما قالولك كده ؟!!
- أنا : آيوه , وربنا .. 
- في سري: بس للأسف ملحقتش اسجل اللحظة التاريخية دي .
- الموظف العجيب إياه : أصل عشان اعملك استعلام لازم تجبلي جواب من االسجل المدني - أنت منين ؟
- أنا : أنا من بلقاس .
- هو : يبقى تجيبلي جواب من السجل المدني في بلقاس.
- أنا : يافندم حضرتك أنا إن مكنتش غلطان أنا واقف في مركز المعلومات المركزي في المحافظة كلها , يعني هما لما تنقص المعلومات عندهم يجيبوها من هنا !! (زي ما زلتوني قبل كده عشان بطاقة الخدمة العسكرية).
- هو : أنت بتفهم يا شيخ , هو المطلوب كده , اعملك ايه أنا .
- أنا : طيب شكرا .


واضح إني مبفهمش فعلا , زي ما الأيام هتوضح ,, والغلطة غلطتي اصلا , انا ايه اللي خلاني من بلقاس , منا كنت اتولدت لأب وام من المنصورة كان أرحم !!

طبعاً اضطريت استنى أسبوع كمان على ما ألحق أروح بلقاس , وكنت دخلت في المشروع وانشغلت , بس جيت من كام يوم  بسلامة نية قلت أما أعدي أخلص الورقة دي , جايز ابويا يكون اتجوز , ورحت السجل المدني .


- أنا : السلام عليكم , لو سمحتم أنا عايز استعلام عن قسيمة جواز.
- موظف اعجب من اللي قبله : أنت تروح المنصورة مركز المعلومات ..
- أنا -باستهبال- : يعني مش مطلوب مني حاجة من هنا ؟
- هو : لأ .
-أنا : طيب أنا جاي من هناك وهما عايزين جواب منكم عشان يطلعوه .
- هو : آآآه  طيب لحظة ,, وفتح الدرج وجاب ورقة مكتوبة بخط الايد (حكومة إليكترونية قال) , وأكيد كان عايز يشتمني عشان حرجته منا شخص بايخ اصلاً بس إن مكناش نتراخم على الحكومة اللي هما مننا وعلينا نتراخم على مين يعني ؟؟


خدت الجواب ورحت المنصورة , وعلى المصلحة وصلت الساعة 8 (دا ايه النشاط دا ياد).
دخلت لقيت الموظف العجيب الأولاني.
- أنا: لو سمحت عايز اعمل استعلام عن قسيمة الزواج بتاعة الحاج بابا , وحرمه مامي , وأنا عملت جواب من السجل المدني.
- هو : طيب طيب (مبصش اصلا في الورقة ولا طلبها - ياابن الـ .... راجل الطيب )  هات جنية و 15 قرش .
وظهر واحد زي المخبرين كده , واقف ورا الموظف لو سمحت يا شيخ الشغل الساعة 8:30 .


طب الموظفين دول قاعدين كده ليه من بدري؟ , وايه المشكلة ما يخلص الورقة ؟ , المهم ما علينا دي نص ساعة , مش هتيجي حاجة في اللي ضاع من العمر .


بعد نص ساعة دخلت واديته جنيه و20 قرش , وطبعا طلبت الشلن ,منا مش هسيب أثر ورايا.

خدت الورقة , وسألته ايه المطلوب أملاه , في حاجات خاصة بشهادات ميلاد وشهادات وفاة, قالي أملى كل حاجة .
لقيت مكتب موجودة جنب السلم قلت اسند عليها وأكتب , جه موظف الأمن بكل احترام الصراحة : لو سمحت يا شيخ مش مسموح تكتب هنا , المدير لو شافك هيبهدلني. أنا آسف .

أنا: ياعم وانت ذنبك ايه - الغلط على المكتب هو اللي مقلش للمدير هو وظيفته ايه في المصلحة!!

طلعت مليت الورقة وأنا واقف ورجعت تاني اسال الموظف أكتب ايه في الخانة دي , قالي : اكتب بيناتك أنت .
جميل , كملت الورقة ورجعت . خدوا الورقة , وقالولي ارجع بعد ساعة وادوني قعر الورقة اللي هو ايصال استلام وتأكد من سلامة البيانات . 


نزلت على المشاية عشان اشم شوية عوادم سيارات وريحة زبالة الصباح على الكورنيش كده يا سلاااام . شوية هوا يردوا ..قصدي يخدوا الروح.
وأنا نازل من قدام مديرية الأمن على السلم اللي قدام معبر المشاة  - وبالمناسبة دا معبر المشاة الوحيد اللي في المنصورة اللي ناس بتعدي من عليه  , مش عشان النظام , لأ لانه قدام السلم ومن حواليه من كل ناحية سور , وطبعا مفيش ولا عربية ممكن تقفلك , اجدعن انت واتشاهد كده وعدي, والمعبر دا له حكاية يمكن ابقى احكيها بعدين.


المهم أنا ذهلت من هول المفاجآة , لقيت عسكري واقف قدام الخطوط البيضا بالعرض اللي بيزينوا بيها الطريق دا  , والاشاعات بتقول انها لعبور المشاة. 
ايه دا , مش معقول , أخيراً اكتشفوا ان مفروض يكـــ ..... عربية سودا معدية قدامه جوز موتوسكلات , وأكيد وراها اتنين شبههم . 


العسكري عدى بسرعة بعد ما العربية عدت , وهو جنبي عليت صوتي : يا شيخ خضتني !!
بص كده وطبعا مفهمش حاجة .
آه طبعا أنا اتخضيت , كنت مفكره واقف للناس اللي مش عارفه تعدي بس الحمد لله العسكري مكنش واقف عشاننا, كده صح أنا كده فايق كده, الحمد لله .


بعد الساعة رجعت , واديتهم الوصل , قام قالي : البيانات بتاعتك غلط . 
أنا : فين دا ؟
-هو : هنا الخانة دي بيانات الوالد , مش بياناتك أنت .
-أنا : يا استاذ منا رجعت وسألتك مرتين اكتب ايه هنا !!!!
وكمان أصلا الخانة دي مكتوب فوقها "بيانات قيد ميلاد / وفاة" , اصلا مش مطلوبة , أنت اللي يهمك الخانة اللي تحتها !!
وكمان معنى إنك اديتني الوصل إن الورق دا سليم. 


شكله كده معجبوش الواد اللي فاهم الورقة دا , لقيته قلب وبصلي كده : وقالي يا استاذ أنا قلتلك بيانات الزوج . 
- أنا: طيب آسف يا فندم , أنا غلطان ممكن تعدلهم بايدك .
- هو: طيب استنى عشر دقايق .


لقيت كراسي انتظار كده في جنب , ومكتوب مخصص لكبار السن والمرضى , عملت فيها عبيط وقعدت , مهو مفيش حد أصلا غير تلاتة أربعة , لدرجة إني مش مصدق إن مفيش طوابير , منا عارف الورقة دي مش هتخلص ألا بالطابور , أرجوكم اعملوا طابور .. طابور يا عالم طابور يابشر ..... صحيت من حلم الطابور على صوت مزعج , أنت يا شيخ !!!
فتحت عيني , لقيت الراجل اللي شبه المخبرين اللي ضيع نص ساعة من عمري : ايوه يا استاذ .
- هو : أنت بتعمل ايه كده . 
- أنا : مستني استعلام عن قسيمة الجواز , قالولي 10 دقايق , (مفتش منهم غير ال 30 ثانية بتوع أحلام اليقظة ).
- هو :طيب أي خدمة ؟!.
-أنا في سري : ايه الزوء دا , شكلك كده عايز ... تخدمني , لا أنا عبيط انت نسيت ولا ايه .
- أنا : شكرا , بارك الله فيك ,
وابتسامة خفيفة - مخبي وراها شوية دموع على حالنا, ايه العالم دي؟.

صوت من جوا شباك الموظف , صوت واحدة ست بتكلم الموظف, يا استاذ فين صاحب ورقة محمود الشربيني , البيانات دي مش موجودة عندنا.
قمت أشوف في ايه , لقيت اللي بتكلمه الموظفة المسئولة عن الكمبيوتر . 
-أنا : إزاي مش موجودة ؟
- الموظف : مش موجودة على الكمبيوتر يا استاذ , تروح تجبلي بيان زواج من السجل المدني .
- أنا في سري : طيب ما تتحايل عليه شوية , يمكن يطلعهم , دا كمبيوتر يعني مش بيهزر .


- أنا : طيب انا لسه هرجع السجل ؟ منا جاي من هناك .. بالمناسبة الورقة دي انت عطلتني عشانها اسبوع ومطلبتهاش (الجواب بتاع السجل ) . 


مشيت طبعا وأنا بدخن ... رجعت كده وقلتله طيب أنا معايا إعلام شرعي بحكم محكمة إن أبويا متجوز امي , تنفع دي ؟!

هو وخلاص طفح كيله : يا استاذ أنا عايز بيان من السجل المدني !!.


طبعا أنا مشيت , وأنا فرحان في نفسي عشان سولت ليا أني ممكن اخلص الورقة دي في يوم كده بسهولة .. ياربي , دا لسه ميعرفش أني مولود برة مصر ... قشطة يا تيفا .. أنت هتطلع عينك .
انا بفكر معملش الورقة دي , ولو اكتشفوا بتوع الجيش إني معملتهاش يبقوا يجوا يخدوني أرحم .. يعني هو ايه اللي هيحصل يعني ؟ 
وكمان انا اصلا كنت عايز ادخل الجيش (بس وأنا صغير بس , أحلام أطفال بقى متفكرش حاجة تانية يعني ).



يا أنا ياانتي ياحكومة يا إليكترونية .......


ملحوظة ضغنونة : أنا باين عليا طولت وكتبت قصة مش تدوينة , بس أنا مبئوء من البشر اللي عايزة تعقد البشر وخلاص , ربنا يهديهم ويصلح حالهم وحالنا يارب , وطبعا مقصدش من التفاصيل المملة دي السخرية أو الاستهزاء بأي حد , بس بفك خنقتي مش اكتر  .
وبما إني مش لاقي حد أفك فيه خنقتي ولا حد أشكيله ,حتى أسامة صديقي الأنتيخ , لأن عنده امتحانات , يارب يخلص , عايزين نجوزه بقى :))




ونوافيكم بباقي الأخبار بعد أبويا ما يتجوز أمي ,,قصدي الحكومة تعترف بكده يعني !!!


سلام.

إمتحانات الدنيا .. وإمتحان الأخرة !!

هل جربت يوما أن تدخل إمتحاناً وأنت غير مستعد ؟


لا أقصدُ بالطبع أن تجد نفسك مجبراً أمام امتحان , ولكن أن تعلمَ أن عندك إمتحان بعد شهر مثلاً ولا تستعد له ثم تدخل عليه.

ما شعورك يومها ؟

ما شعورك وأنت أمام ورقة أسئلة , وأنت لا تعرف إجابة لأي سؤال ؟
اعط نفسك فرصة للإجابة ,,


إذا كان هذا الشعور في إمتحان الدنيا ,ولك أن تتخيل موقفك , مع علمك بأن هناك دائما في الدنيا فرصة للإعادة.
لكن ما ستفعل إذا كان إمتحانك هذا أمام الله ؟
فلن تدخل في دور ثان ٍ  ولن يكون لك حق الإعادة ..

حَتَّىٰ إِذَا جَاءَ أَحَدَهُمُ الْمَوْتُ قَالَ رَبِّ ارْجِعُونِ , لَعَلِّي أَعْمَلُ صَالِحًا فِيمَا تَرَكْتُ ۚ كَلَّا ۚ إِنَّهَا كَلِمَةٌ هُوَ قَائِلُهَا ۖ وَمِنْ وَرَائِهِمْ بَرْزَخٌ إِلَىٰ يَوْمِ يُبْعَثُونَ [المؤمنون:99-100]

لقد ذُهلت من هذه الفكرة حقاً وأنا في بداية إمتحانات هذا الفصل. وكنت في ليلة الإمتحان على أوشك أن لا أذهب للامتحان صباحاً , ببساطة أنا لم أفتح الكتاب طول السنة ولا حتى قبل ايام الإمتحان .. ماذا سأكتب غداً؟
لكن ببعض التفكير توصلت إلى أن على أن أجرب حظي وهناك فرصة أخرى , حتى لو لم أنجح!
هذا تفكيرنا في الدنيا , ولكن دعني أكمل , دخلت اللجنة فعلاً وكتبت ما أتذكره من المحاضرات , وبعد أن أنتهيت وجدت نفسي في نصف الوقت وقد حللتُ نصف الأسئلة , ولا أضمن النجاح بها , ولكن لم أعد اطيق أن انظر في الورقة , فأنا أعرف أني لا أعرف.
طلبت الخروج ولكني فوجئت بالمراقب يقول : لا يسمح بالخروج قبل ربع ساعة من الوقت !
ما هذا , ماذا سأفعل طول هذا الوقت إذاً ؟
وهذا الشعور أقسي من سابقة ...
أنت مضطر للإنتظار .
ومرة أخرى انظر ليوم القيامة , وما حل المقصرون الذين جاءوا بأوراق إجابة .. عفواً بصحائف أعمال شبه فارغة ؟ كيف يمر عليهم هذا اليوم ؟

إِنَّ هَؤُلَاءِ يُحِبُّونَ الْعَاجِلَةَ وَيَذَرُونَ وَرَاءَهُمْ يَوْمًا ثَقِيلًا [الإنسان : 27] 

نعم ثقيلا !


 مَنْ جَاءَ بِالْحَسَنَةِ فَلَهُ خَيْرٌ مِنْهَا وَهُمْ مِنْ فَزَعٍ يَوْمَئِذٍ آمِنُونَ [النمل:89]





إن الله بفضله يهون علينا في الدنيا , وجعل لنا الدنيا دار نعيش فيها , نخطئ ولنا فرصة للتصحيح, ولكن إذا كان الموت فلا فرصة أمامك أبداً أن تصحح ما مضى . لقد سلمت ورقتك وانتهى !


سبحان الله , 
كيف نعلم أن أمامنا إمتحان , نعرف أننا سندخله في أي لحظة ثم لا نستعد له؟
كم نحن مقصرون .. 
غريب هذا الإنسان , يعلم أنه سيقف يوماً بين يدي الله , ويعلم أنه مسئول , ولا يتحرك.

ومع هذا يوم يكون في شدة لا يجد إلا الله يقف أمامة  , كم أنت ضعيف ؟!
فعلامَ التكبر إذا ؟!!

وَإِذَا أَنْعَمْنَا عَلَى الْإِنْسَانِ أَعْرَضَ وَنَأَىٰ بِجَانِبِهِ وَإِذَا مَسَّهُ الشَّرُّ كَانَ يَئُوسًا ﴿الإسراء: 83﴾

وَإِذَا مَسَّ الْإِنْسَانَ الضُّرُّ دَعَانَا لِجَنْبِهِ أَوْ قَاعِدًا أَوْ قَائِمًا فَلَمَّا كَشَفْنَا عَنْهُ ضُرَّهُ مَرَّ كَأَنْ لَمْ يَدْعُنَا إِلَىٰ ضُرٍّ مَسَّهُ كَذَٰلِكَ زُيِّنَ لِلْمُسْرِفِينَ مَا كَانُوا يَعْمَلُونَ ﴿يونس: 12﴾ 

بَلْ يُرِيدُ الْإِنْسَانُ لِيَفْجُرَ أَمَامَهُ  ﴿القيامة:5﴾





ورُوي عن الفضيل ابن عياض  أنه قال لرجل : كم أتى عليك ؟
قال الرجل : ستون سنة
قال الفضيل : فأنت منذ ستين سنة تسير إلى ربك توشك أن تبلغ
فقال الرجل : إنا لله و إنا إليه راجعون
قال الفضيل : أتعرف تفسير قول : إنا لله و إنا إليه راجعون ؟!!
فمن علم أنه لله عبد وأنه إليه راجع فليعلم أنه موقوف ، ومن علم أنه موقوف ، فليعلم أنه مسئول ، فليعد للسؤال جواباً ..
فقال الرجل : فما الحيلة ؟
قال الفضيل : يسيرة.
قال الرجل: ما هي ؟
قال الفضيل: تحسن فيما بقي يغفر لك فيما مضى ، فانك إن أسأت فيما بقى ، أخذت بما مضى وما بقى والأعمال بالخواتيم.



إننا نتساهل في أمر الوقت كثيراً وهو أمر خطير .. كل دقائقك محسوبة , إما لك , أو عليك فخذ حذرك بالله عليك.


أعوذ بالله أن أذكركم وأنسى , وأدعوكم للهداية وأضل وأغوى.

ليه ؟

السلام عليكم ورحمة الله وبركاته

امبارح كانت نهاية إمتحانات الفصل الأول - من آخر سنة دراسية (إن شاء الله).
وكان الطلوب كالعادة ... أن أنسى الإمتحانات ,, وأعيش بقى ... وبكرة تروق وتحلى .. مش كده ؟!!

أول مرة تعدي عليا إمتحانات بالطريقة دي ... بجد اللي حصلي دا محصلش قبل كده !!
أنا مش عارف لغاية النهاردة في ايه ؟!!

إيه اللي بيحصل دا ؟
أنا بقيت كده إزاي ,, ووصلت هنا ليه ؟

مش عارف إزاي ابقى مش بذاكر طول السنة ,, ومش بحضر ,, وإن حضرت بروح أنام في أخر بنش ,,, وتيجي الإمتحانات ومفتحش كتاب !!!!!
أنا بروح أذاكر في اللجنة والله ..

والمصيبة إني ممكن بعد دا كله أنجح !!
آه والله بنجح ,, تصدق دي ؟

معتقدش حد متصور الوضع إلي أنا فيه دا ...
بس أنا مش مستغرب أنا مش بذاكر ليه ؟!
بالعكس أنا عارف المشكلة دي عبارة عن تراكمات كتير من سنين مش من يوم ولا يومين ...
اللي مستغربله أنا مش بحس ليه ؟؟

نفسي أعيط بجد ندما على الوقت والعمر اللي بضيعه دا ولا حتى على ذنب أنا عملته ... بس مش حاسس أصلا بحاجة ..
الدموع مش راضية تنزل ليه ؟

طيب تصور نفسك عندك امتحان شبكات الصبح الساعة 9 ,, وإنت دلوقت الساعة 6 المغرب وصاحي من النوم ,, ومش مذاكر أي حاجة !!
آه والله ولا حاجة ...
وتفتح المذاكرات وتقرأها (قراءة بس من غير ما تمسك قلم ) كلها
وبالشفا كده ....

أنا أصلا ليه بذاكر من المذكرات ,, منا طول عمري بكره المذكرات وعمري ما ذاكرت ألا من الكتاب أو من ورا الدكتور أو المدرس في المدرسة ومن التلخيص إلى أنا بعمله... أنا أصلا رافض لفكرة الدروس الخصوصية والورق بتاعها ,,, ومخدتش دروس ألا في الثانوية العامة ,, ومجبر أخاك لا بطل لأن أصلا مفيش مدرسين في المدرسة ,, كنا بنروح ناخد التغذية ونقطع ورقة الغياب ونرجع .

إيه اللي أنا فيه دا ؟!
أنا مش عارف والله أنا بعمل ايه ,,, مش عارف ازاي بعمل كده وإزاي مستحمل الوضع دا ,,
ولا مستحمل ايه أنا مش حاسس بحاجة اصلا وفاقد الشعور والمسئولية ..
بس أنا اتخنقت بجد ,,, ومش لاقي حاجة اعملها أكتر من كده ,,

طيب أنا بفضح نفسي ليه أصلا هنا ,, وليه بكتب كده وإزاي ؟؟
برضو والله دي مش عارف ليه ؟

أنا فتحت موقع الجامعة وغريبه لقيته شغال ,, المهم قعدت اتصفح القسم بتاعنا وأشوف المواد اللي انا درستها من 5 سنين ,, أنا استفدت ايه من 5 سنين ؟؟ اتعلمت ايه ولا عملت ايه ؟
ولا حاجة والله .. أنا اصلا مش فاكر أنا اتعلمت ايه ولا خدت ايه ؟
دورت على الكتب ,, ودي الحسنة الوحيدة اللي عملتها إني محتفظ على كتبي ,,, ايه الكلام دا ,, أنا درست دول امتى؟ ولا فين ؟

طيب كنت تاعب نفسي ليه أصلا وحارق نفسي عشان أدخل هندسة ؟
مكنت دخلت صناعة ولا زراعة ,, وخصلت وكان زماني راجل كسيب ومعايا صنعة ,,, ومتجوز وعايش زي بقية البشر دول ...

ليه الواحد معدش عنده هم يعمل أي حاجة غير إنه يضيع وقته وخلاص ...
آه طول عمري مش دحيح مذاكرة ولا حاجة .. بس كنت لما بتزنق في الامتحانات بذاكر وبخلص كل حاجة ومبسبش حاجة الا لما أذاكرها ,, وكنت بحس إني عملت حاجة !!

دلوقت أصلا مش حاسس إني أستحق أنجح ,, أصلا مكنتش استحق أوصل للبكالريوس ... ومع كده وصلت ..
أنا كرهت الجامعة والنظام الفاسد بتاعها اللي وصل واحد زيي ,, (وأكيد في زيي كتير ) للمكان دا وإحنا منستحقش أصلا ..

أنا فاكر في امتحان الشبكات وقواعد البيانات الدكتور كاتب في أول الصفحة
Trust yourself and prove that you are worthy qualified for engineering title

وكنا طالعين من اللجنة نهزر ,, طب والسؤال دا إجابته ايه ؟! و ها ها ها ..

بس أنا عارف ومتأكد من الإجابة ...
أنا مستحقش أصلا ابقى هناك ...


أنا اللي عايز ألاقي له إجابة بس ,,, أنا ليه فقدت كل قيمة في حياتي ,,, ليه فقدت الهمة للعمل والبذات المذاكرة والعلم؟

معدش عندي إستعداد أعيشها كده وخلاص ...
الوضع دا لازم ينتهي ,, وحالا لأني مش هبقى كده ...
وإن شاء الله مش هرجع زي كل مرة ...


يارب يارب يارب أنت المعين .
اللهم لا تردني ..


تحديث:
شكرا لكل من ردوا عليّ ..
بس الحقيقة محدش منكم فهم أنا عايز ايه , للأسف.
أنا مش زعلان من إمتحاناتي ولا زعلان من الكلية ولا زعلان من النظام.. مع إن كلهم مشاكل.
أنا اللي زعلان منه هو نفسي ونفسي بس ,,
وبيقولوا نفسك إن لم تشغلها بالحق ,, شغلتك بالباطل..
دا بالظبط اللي أنا فيه ودا اللي أنا عايز أصلحه... عشان كده نزلت بعد آخر امتحان ورحت مكتبة الإيمان في المنصورة وأشتريت كتابين لابن قيم الجوزية : الداء والدواء( أو الجواب الكافي لمن سأل عن الدواء الشافي) , وإغاثة اللهفان من مصايد الشيطان.. وبنصح الكل إنه يقرأهم إذا أمكن .
أنا مشكلتي إن قلبي بجد اتملى بأمراض الشبهات والشهوات ,, وبدأ يموت ,,,, دا إن مكنش مات فعلا ...
عشان كده كان لازم ندور على العلاج ,,,,

وكلٌ ادرى بمصيبته !!!

بارك الله فيكم.

من إبداعات إلامتحانات...

وجدتها معلقة على باب غرفة في المدينة الجامعية!
الفكرة أعجبتني, وتكسر ملل المذاكرة :)

بالإضاقة إلى تذكير الضيوف "الثقال" ..

ربنا سترها ....