ربنا يوقفلكم ولاد الحلال !!!

السبت، 15 مايو 2010 ·


السلام عليكم ورحمة الله وبركاته

النهاردة كان أول أيام إمتحانات الصف السادس الإبتدائي ! وفي الحقيقة أنا مكنتش هعرف إن هوا دا اليوم التاريخي لولا إن أختي الصغيرة السنادي في سنة ستة عقبال عندكم ، المهم اللي مخليني أكتب النهاردة إنكم بكرة هتفتكروا إن اليوم دا من أسوأ الأيام اللي بتمر على الشعب ، وبكرة تعرفوا وتقولوا مصطفى قال .

بصوا أنا زهقت أتكلم عن المدارس والمدرسين والقرف دا كله ، النهاردة أنا هتكلم عن حاجة تانية خالص ألا وهي السادة المبجلين أولياء الأمور : ربنا يحرقكوا ارحموا أولادكم وارحموا البلد وارحمونا بقى .

باين إني منفعل شوية بس بجد مفيش حاجة أحسن من كده ممكن أعبر فيها عن اللي الموقف . إذا كان التعليم بايظ في البلد بسبب المدرسين اللي مبيشرحوش - دا إذا كانوا مؤهلين أصلاً لكده - وبعدين المدرسة اللي ملهاش اي لازمة ولا بتربي ولا بتعلم ... إلخ إلخ الكلام دا كله ... بس أنا من وجهة نظري إن اللي يستاهل الحرق أصلا هما الناس اللي في البيت اللي بتربي عيالهم على كل حاجة غلط .. وبعد ردح من الزمن يخرجلنا شوية بهايم يمشوا في الشوارع وتلاقيهم فكل حتة من شوارع للمصالح الحكومية .. لكل حتة .

برضوا عشان أوضح ايه اللي مخليني أقول كده - وليه دا يوم أسود في جبين البلد . جرب تروح عند مدرسة ابتدائي في أي مكان وأنت تشوف بنفسك مدى التخلف اللي وصلناله. أولياء الأمور يا جماعة بيتخانقوا مع المدرسة والمدرسين عشان يغششوا العيال .!! آه وربنا ،،، بعد كده بقى نيجي نسأل هو ليه موظفين الحكومة بيطلبوا الرشوة ،، هو ليه العربيات بتمشي مخالف بكل بجاحة ، مهو يا حضرات هي دي النتيجة الحتمية للي متعلم الغش من وهو لسه نغة.

من فضلك إذا كان ردك - بينك وبين نفسك - على كلامي ، طب وايه المشكلة مهي الطلبة كلها بتغش ، ميغشوا براحتهم ياعم ، إنت هتقفلها ليه ؟ من فضلك إن كان في نفسك حاجة من الكلام دا ، اقفل الصفحة دي حالاً لأنك بالنسبالي واحد من البهايم اللي مضيعين البلد ومضيعنا معاهم، اقفل الصفحة حالاً متخلنيش أشتم أكتر من كده ....

الجيل اللي يتعلم من وهو في ابتدائي إنه يغش ، وإن المدرسة دي ملهاش لازمة ، منا كده كده باخد دروس والدنيا زي الفل ، هو دا الجيل اللي هيخرج بعد كده عشان يمسك البلد ، والنتيجة الحتمية هي القرف اللي احنا شايفينه في الشوارع دا .

الغش مش حاجة سهلة يا جماعة ، وربنا مهو سهل أبداً ، اللي يتعلم إنه يقبل دلوقت الغش في المدرسة ، بكرة لما يخرج للمجتمع هيعمل أكتر من كده ، ومش هيبقى في رقيب ولا حسيب عليه.

الست اللي واقفة قدام المدرسة عشان ابنها أو بنتها بتمتحن وقاعدة تدعي : "ربنا يوقفلكم ولاد الحلال اللي يسهلوها عليكم" وطبعا دعوة باطل ، هي دي اللي المفروض تتحاسب قبل المدرسين وقبل المسؤلين عن التعليم . هي مفكرة إنها كده بتنفع ولادها مع إنها بتضرهم أكبر ضرر لو تعرف ، وفي الآخر برضو هتتسأل يوم القيامة عن ولادها ،، مش هتتعتقي يعني مش هتتعتقي ... النوعية دي من البني آدمين عايزين الحرق في ميدان عام واللي هيفضل من الشعب -إن فضل حد غيري يعني - يصب الجاز الأسود عليهم ، دا بعد ما يترجموا بالجزم القديمة .

أنا بطلت عموماً أروح عند المدرسة مع أختي من زمان ، أصلي كل ما أروح أتخانق مع البهايم دول أعمل ايه ، وبعدين إن ملقيتهمش ألاقي أختى طالعة تعيط ، مالك يا بنتي ؟ أصل المللسة خدت الورقة من قدامي وادتها لزميلتي عشان تنقل منها .
وتروح تشتكي يقلولك هنعمل تحقيق ونبقى نقولك على النتيجة ، وموت يا حمار !!!

وياريت كل دا بيجي بفايدة ، والله العيال اللي بيكتبولهم الإجابات على السبورة مبيعرفوش ينقلوا ، أصل المشكلة مش في الإجابة، المشكلة إنه مش عارف يكتب مهو مش بيتعلم من أصله.

يا جماعة التعليم دا هو السبيل الوحيد لخروجنا من البلاوي اللي إحنا فيها دي ، إن كنا مصرين إن الأجيال اللي بعدنا تتطلع بنفس المنظر اللي إحنا طالعين بيه ، وإن كان دا هيفضل حال التعليم من ابتدائي للجامعة ، يبقى انسوا التغيير في البلد دي ، البلد دي عايزة ناس متعلمة ومتربية وعارفة ربنا .

لحد كده وكفاية أنا زهقت.






9 علقوا عليها:

أخـت فـى الله يقول...
16 مايو 2010 في 11:33 م  

السلام عليكم..
و صلى على النبى
كنت لسه بكلم والدى على ايه احسن المدارس اللى ممكن ادخل اولادى فيها بحكم انه موجه على المدارس..مشرف يعنى
وكنت اقصد من السؤال تحديدا تربية الطلاب هناك واخلاقهم ومستواهم الاجتماعى اللى اقدر اطمن على الاخلاق اللى حتكتسب لطفلى
كانت النتيجة مؤسفة الحقيقة
ولازم عشان اضمن جو تعليمى وتربوى جيد لازم اكع دم قلبى
المدارس التجريبية احسن الوحشين
لو لقيت مدرسة اسلامية جيدة حدخل عيالى فيها
بجد بقت مشكلة حكاية المدارس..لان لو ما احسناش وامختناش افضل المدارس لاولادنا
حتبقى طااااااامة كبرى
ممكن ابنك ييجى مصاحب او مشوش فى العقيدة او عليه بوادر انحراف بجد!!

Dr. Ibrahim يقول...
17 مايو 2010 في 12:12 م  

حبيبى ابو مصطفى :)
فعلا العيال اصلا مبيعرفوش يكتبوا ولا يقرأوا عايزين اللى يكتبلهم فى الورقة
حاجة تقرف

غير معرف يقول...
19 مايو 2010 في 4:42 ص  

ان الله لايغير مابقوم حتى يغيروا مابأنفسهم

TIMMY !! يقول...
20 مايو 2010 في 10:32 ص  

السلام عليكم و رحمة الله ,

اهدأ يابني كده ,
الانفعال مش حلو عليك ,
انت داخل على امتحانات يابني و الشعب عاوزك :)

بالنسبة للابتدائي ده , الواحد فعلا بيلاقي أولياء أمور - خاصة أمهات - رايحين مع ولادهم , و يحاولوا يدخلوا يوصوا عليهم !! و يستنوهم بعد اللجنة !!

إيه يا جماعة ؟؟ هي ثانوية عامة ؟؟

و عندك حق , فعلا حتى لو كتبوا لهم على السبورة , ما بيعرفوش ينقلوا ,

لكن تقول إيه بقى يا مصطفى ,
التعليم بااااااااااظ من غير رجعة ,
و عن عمد ,
و مش ناويين يصلحوه ,
لأنه عاوزين الناس تتجه للتعليم الخاص ,
الكلام ده قاله لنا دكتور ميكانيكا كان بيدينا دورة , و هو أحد مستشارين وزير التعليم ,

ربنا يسترها على أولادنا في المستقبل ,

مصطفى محمود يقول...
24 مايو 2010 في 12:29 ص  

@أخت في الله
وعليكم السلام ورحمة الله وبركاته

مهي بداية الإنحدار تبدأ من الأطفال
ربنا يصلح الحال

@Dr Ibrahim
حبيبي يا دكترة :)

هو أنا عايز أضيف إنها غير إنها حاجة مقرفة ، فهي حاجة مقززة :D

@Anonymous
ربنا يهدينا للصلاح
آمين

@ TIMMY
وعليكم السلام ورحمة الله وبركاته

مهو انت أصلك متعرفش
أصل التعليم الخاص بايظ هو كمان ، على رأي أخت في الله هو "أحسن الوحشين" .

والله يا هندسة الواحد زهق وكل ما يفكر هو ايه اللي المفروض يتعمل عشان البلد دي تقوم ، دماغه توجعه .
الحقيقة مرة جداً

ربنا يصلح حال الجميع



شكراً للجميع ، واعتذر لتأخر الردود
بارك الله فيكم

غير معرف يقول...
5 يوليو 2010 في 11:17 ص  

انا بجد باتخنق من مواقف الجهل والتخلف اللى بتزيد كل يوم عن التاني
تعرف مرة وانا في اولى اعدادي كان عندنا امتحان شهر تقريبا
المهم انا خلصت الامتحان وسلمت الورقة بتاعتي للاستاذ ومشيت
بعد ما رجعت تاني يوم لاقيت زمايلي بيقولولي ان المدرس خد ورقتي واداها لابنه اللى كان معايا في الفصل ولما العيال زعقوا واشمعنى هو وبتاع راح مغششهم كلهم من ورقتي
انا مكنتش مصدق نفسي ساعتها وان ده ممكن يحصل وخليت والدي راح المدرسة واشتكى بس زي مانت قلت ولا هايعملوا حاجة
واتعلمت بعدها حتى لو خلصت بدري ماطلعش غير في اخر اللجنة

بس انا باختلف معاك في جزئية المدرسة ، لان فعلا المدرسة معتش ليها اي دور لا في تربية ولا في تعليم
وباحس كده ان النظام التعليمي في مصر محتاج يتنسف ويتعمل من اول وجديد بدل الهبل اللى شايفينه ده

مصطفى محمود يقول...
5 يوليو 2010 في 12:14 م  

@سمو الأمير

حمد لله على السلامة اﻷول يا هندسة :)
ويارب تكون الإمتحانات كانت كويسة ، طمنا

المشكلة مبقتش إنها مواقف جهل ، دا المشكلة إنه بقت الطبيعي ولما تيجي تتكلم تبقى انت الغلطان والمتخلف.

حاجة تقرف بجد

معاك حق ، النظام لازم يتهد ويتبنى من جديد ، ﻷن مفيش فايدة :D

ساسو يقول...
28 نوفمبر 2010 في 11:28 ص  

مدونتك جميله جدا
تقبل مروري

مصطفى محمود يقول...
28 نوفمبر 2010 في 11:44 ص  

@ساسو

شكراً
بارك الله فيك :)

About this weBlog - عن هذه المدونة



هذه مدونتي الشخصية ,,

أرسم فيها عالم من خيالي.
فيها أبدا بعض تفاصيل حياتي من تحت الصفر !
أحلامي بسيطة ,, وغير متأكد من أني سأحققها يوما ما , ولكن كل ما أتمناه أن أخرج من هذه الدنيا على هذا الدين , فاللهم نسألك الثبات!



تلاوة القرآن الكريم

TvQuran

تظبيط

لغتي هويتي

لغتي
قد أكون أنا ايضا مضيعا لها
لكنه لا يمنع أن نتناصح

تويييت

تتبعني على تويتر