الصراحة راااحة

السلام عليكم ورحمة الله وبركاته .

أكيد طبعا إحنا عارفين إن الصراحة راحة.
ودايما بنربط الصراحة بالندم وتصحيح الأوضاع والاعترافات والتغير.
لكن أن تصل إلى حد البجاحة والتلامة فدا اللي مش مقبول بالعقل كده .
وإن كانت الصراحة نفسها مطلوبة بس لازم بعدها يكون في أي تغير في اﻷوضاع.

مش هطول
الموقف إني كنت إمبارح بذاكر مع واحد صاحبي في المدينة الجامعية , وأنا خارج قلت أما عدي على فرن العيش بتاع الجامعة أشتري عيش بدل ما الوالدة تنزل الفجر في البرد دا تشتري عي(شهم قوي ياخويا )

وكالمعتاد طبعا طابور والذي منه ودا مش مشكلة اصلا ﻷننا اتعدونا على كده .
لأ دا بالعكس ساعات بيكون الوقت قدام الفرن وقت ظريف وفرصة للتعرف على ناس جديدة - اه منتا ممكن تقف ساعتين على ما تاخد العيش .

المهم ربنا فرجها والعيش طلع بعد ما طلع روحنا مع إن العيش موجود جوة بس مش راضي يطلع ألا بمزاجه.
ولما طعه بقى يطلع 5 أكياس بـ 5 عشان يذلنا كمان شوية .

وفي التوزيع حصل الموقف اﻵتي :
طابورين واحد رجالة والتاني ستات , وطبعا عشان إحنا متأخر مفيش ستات .
حلو قوي
يجي واحد من بره - إزيك ياعمدة؟ أنا عايز 4 أكياس !!!
-عمدة: اتفضل يا زعيم .

طبعا اللي واقف على الشباك اتغاظ قوي , ازاي يدي اللي جاي من بره ويديله 4 كمان مع أنه مبيديش أكتر من 2.
-أيه يا ريس ؟ ينفع كده يعني إحنا واقفين طابور وانت تدي اللي برة ؟ دا كلام .

شوفوا الرد بقى :
-عمدة: في حاجة؟ إحنا هنا ماشين بمزاجنا ومحدش له علينا كلام.
لو عاجبك تقف في الطابور وتاخد زي الناس. إحنا ملناش قانون ولا عندنا ذمة ولاضمير من اﻵخر !!!!
- طيب ليه تديله 4 اديله زينا 2 بس .
- أنا حر بمزاجي , دا واحد معرفة وانا أديله اللي انا عايزه.
أنا طلبت أتنقل من هنا 10 مرات قبل كده ومحدش معبر فينا.
يبقى أعمل اللي أنا عايزة بقى !!!

طبعا لحد هنا والجدع اللي قدام الشباك سكت خالص (مهو هيقول ايه بعد كده ؟!)
والتعليقات من ورا بقى:
واحد كبير ورايا: لاحول ولا قوة إلا بالله(ويخبط كف بكف) استغفر الله العظيم.
واحد تاني: وربنا لما أخلص كلية لاروح أفتح فرن في بلدنا وهوقف البلد كلها طابور ومش موزع عشان أذلهم .
واحد ثالث: والله راجل جدع , الصراحة راحة برضو!!


هو أنا على فكرة مش بتكلم على ازمة العيش والذي منه , مع إني مش قادر استوعب إزاي مصر كبلد زراعي عريق "المفروض" يكون فيها ازمة دقيق بالشكل اللي مخلي الناس تتخانق على أفران العيش.

دا مش موضوعي أصلا .
بس الموقف نفسه يخليك تفكر إيه اللي خلى الراجل يقول الكلام دا؟!
طيب الناس دي ذنبها ايه ؟!

بصراحة أكتر أنا شايف إن كل اللي كانوا واقفين في الطابور يستاهلوا كده (بس أنا مش منهم طبعا )
تقولي ليه ؟
أولا الراجل اللي كان بيتخانق دا أصلا واخد دوري وانأ نفضت وكبرت دماغي.
هو يعني هياخد أكتر مني ولا هيجيله عيش أحسن - بالاضافة إني فاضي أصلا (يادوبك عندي إمتحان الصبح -ايه يعني؟ )

وأي واحد من دول لو جتله فرصة يعمل زي اللي خد دا هيعمل زيه بدون أي حرج؟

دا غير إن لو واحد واقف في الطابور وقاعد يوعظ فيك ويقولك مش لو كل واحد يحترم الدور مكنش دا بقى حالنا , وساعة ما العيش يطلع ويزغلل في عينه ينط علطول عليه. محنا كلنا ساعتها مبنبقاش فاضين ؟

شفتوا بقى إننا نستاهل ؟!!

اللي بيوزع العيش دا على بجاحته (مش صراحته) بس عرف كويس يسكت كل الناس وريح دماغه , مهو كل واحد هيقف قدامه هيقوله نفس الكلمتين وهو مش فاضي للكلام دا بقى

أنا بقى قلت أما أعمل فيها ناصح ولما جه دوري قلتله أنا عايز 4 أكياس !! قالي ﻷ مبنديش غير2 (منا مش معارف )
طيب هات 2 يا باشا

خدتهم ورجعت وقفت في الطابور تاني (مهو مكنش ورايا غير 3 بس)
ولما وصلتله تاني قلتله عايز 4
ضحك وقالي مفيش ألا 2 !!

بس أعتقد الرسالة وصلتله واعتقد كمان أنه إنسان كويس بس الظروف هيا اللي مخلياه يعمل كده , ولو إن دا مش مبرر.

اللي عايز اوصله إن مبدا الفهلوة و تفتيح الدماغ اللي إحنا مشاين بيه دا ومفكرين إننا كده مطاطأين ومفتحين عشان عارفين نصرف أمورنا ونسلك العملية والدنيا ماشية زي الفل مش هينفعنا حتى على المدى البعيد.
كل أما نعمل كده كل أما هنشوف وبتهيألي اللي إحنا شايفينه كفاية أصلا.

على فكرة - دا مش تذمر ولا سخط على عيشتنا ولا حاجة استغفر الله العظيم.
ولا دي مثالية مني ولا حاجة !!
بس انا موقن تمام اليقين إن لازم فعلا نكون صرحا مع نفسنا أكتر عشان نعرف نحل مشاكلنا ﻷن محدش هيحلهالنا غيرنا
لا يصح إلا الصحيح في الآخر برضو.
مطلوب إننا نبقى صرحا بس بشكل إيجابي.

سلام