عودة من جديد

السلام عليكم ورحمة الله وبركاته

الحمد لله رجعنا وبقينا online من تاني


الفترة اللي فاتت دي كان عايش في عالم بدون "نت"

وهنرجع نقف قدام نفس السؤال

ما المساحة التي يشغلها النت في حياتك ؟

مبدأيا كده
حاليا انا مقتنع جدا بالمقولة اللي بتقول
إن العمل يملأ الوقت المخصص له وإن كان كبير

النت كان مالي كل حياتي لفترة طويلة جدا
بصراحة انا كنت - ويمكن ما زلت- مدمن نت

وكان دايما السؤال اللي محيرني
هو لو النت قطع هعمل ايه ؟؟

واهو حصل والظروف خلتني من غير نت لشهر كامل

ومحصلش حاجة وعايش وزي الفل أهو

بس الغريب بقى اني كنت مشغول جدا الفترة اللي فاتت

مكنتش متوقع كده وكنت بقول دا هيبقى في فراغ كبير بسبب غياب النشاط الاساسي بالنسبة لي وهو النت !!!

أبدا والله
كنت ساعات بوصل البيت الساعة 12 بالليل من كتر النشاطات اللي عملتها في الفترة دي ..

كل اللي عايز أوصله إن ساعات المواقف تحدث تغيرات عميقة في الافكار
خصوصا إني مع كل انقطاع للنت بيحصلي تغيرات جذرية فعلا في أفكاري وكيفية استخدامي للنت

----------

نيجي بقى للفترة اللي فاتت دي وهكلمكم شوية عن حاجة من الحاجات المشرقة في حياتي بجد




طبعا انا كلمتكم عن depiak قبل كده ووضحت انها ضمن بوتقة ال CAT ودي أكبر أسرة في جامعة المنصورة
واكبر نشاط طلابي بجد تقدر تقول عليه بيقدم شئ مفيد للطلبة المهتمين بالمجال بتاعنا
الكات نقطة مضيئة في حيات ناس كتير أنا أولهم
بجد كل اللي عايز أقوله إني بشكر كل واحد إدى وقته وجهده عشان يظهر العمل المحترم دا

ربنا يوفقهم ويجعله في ميزان حسناتهم ,,

----------------


نيجي بقى للجانب الغير مشرق
محنا نورنا النور في الكلام اللي فات
يبقى نقفل النور هنا
عشان استهلاك الطاقة

طبعا أكيد عارفين أنا بتكلم عن إيه ؟
الكلية طبعا مفيش غيرها
وتحديدا مشروع التخرج اللي محيرني وراه دا

بعد وقت طويل وجهد غزير المشروع يتم رفضه للاسباب قد تكون غير منطقية
بجد شئ محبط للغاية

مع كده ,, ومع كل الوقت والمجهود اللي ضيعناه
مش عايز اترك مجال لليأس إنه يتسلل

أكيد في شئ غلط في الموضوع
مهو لو العيب عيب كلية بس مكنش ليا زمايل قدموا مشاريع واتوافق عليها وشغالين فيها دلوقت

ممكن اعتبر اللي حصل دا فرصة للبحث عن الخطأ ومحاولة الإصلاح

ترى هل يسعفنا الوقت ؟؟!!!

ما زالت الاجابة مجهولة


سلام