السلام عليكم ورحمة الله وبركاته
طبعا كل سنة وانتو طيبين النهاردة 19 مارس عيد تحرير طابا ,, واحنا واخدين أجازة وقاعدين في بيوتنا بقى ومفيش دراسة ,,, وكل لطلبة اللي في بر مصر فرحانين والاهالي مع كده متضايقين - شوف بيكرهوا فرحنا .
الموقف الطريف اللي حصل من كام يوم لما كنا في الكلية وقاعدين بنتناقش هو يوم الخميس الجاي -اللي هوا النهاردة- أجازة ليييييه ؟
وكل واحد كان بيدلوا بدلوه بقى , والتفسيرات بقى ,,
أول واحد قال دا عيد تحرير سينا ,, طبعا محدش صدقه لان عيد تحرير سينا مش دلوقت - انا معرفش امتى بس هو مش دلوقت وخلاص -
التاني قالو ياعم دا عيد تحرير طااااابا !!!
طلعت أنا وبصيتله من فوق النضارة كده وقلتله طيب يا فالح لما هو عيد طابا اشمعنى الطلبة بس اللي واخدينه ؟!!
السؤال منطقي برضو والواد سكت ,, قام واحد من النص وقالي امال ايه يا جامد انت ؟؟!!
قلتله أكيد حاجة خاصة بالطلبة ,, شوفوا انتو عملتوا ايه يوم 19 مارس وبيحتفلوا بيه ؟؟
محدش رد طبعا لأننا معملناش حاجة وربنا !!
يعني هو مش عيد الطلبة على غرار عيد العمال كده !!
أمال ايه دا ؟؟
في الاخر قولنا الاعياد دي حاجة تاريخية ,, وبما ان العملية التعليمية دي بقت حاجة تاريخية عندنا يبقى احنا المفروض نحتفل بالعلم !!
وخلاص رسينا انو عيد العلم في الاخر ,,,
بس المشكلة بقى انه مطلعش عيد العلم ,, دا طلع عيد تحرير طابا بجد ,,
ويبقى السؤال بقى : طيب اشمعنى الطلبة اللي بيحتفلوا بيه ؟!!
ولا هما عايزين يعلمونا ازاي نحرر الأرض وبعدين نبيعها !!!
حسبنا الله ونعم الوكيل
16 علقوا عليها:
انا اتسألت السؤال ده فى الشغل
هو النهاردة المفروض اجازة ليه؟؟
قولتلهم النهاردة عيد تحرير طابا..
طبعا رد الفعل اللى لازم يحصل كل الوجوه مزبهلة كده ما اعرفش من ايه هو انا قولتلهم اننا هنحارب ولا الاهلى خسر ولا ايه :)
قالولى و ده طلع امتى؟؟
قولتلهم دا جديد بالاسواق لسه طازة نازل السنادى :)
لسه بردو رد الفعل مزبهلين
و كله بيقول فى سره تحرير طابا؟؟
و الكومنت الجميل اللى السكرتيره قالته
طيب ما تيجوا نشوف حد يحتل المنصورة و نحررها و نعمل اسبوع اجازة عيد تحرير المنصورة :)
بصراحة دا احلى كومنت سمعته من كل الناس اللى سألأتنى هو النهاردة اجازة ليه؟؟؟
الاجابة يا جماعة جديد حاليا بالاسواق :)
وشكرا :)
رداً على سؤالك
النهاردة الجمعة
20/مارس/2009
معلش اصل انا احب الدقة
وانت من الاول عامل العنوان
هوا النهاردة ايه؟يعنى اسمع سؤال
واعرف اجابته وماردش؟مايصحش برضه!
مش عايزة اقولك كنت حاقدة اد ايه
عليكم امبارح:( بس برضه
قلبى معاكم علشان لسسسسسسه
فيه امتحانات وسكشينات
وملازم ومحاضرات وحاجات
كتيرة اوى توجع القلب
بناقص يوم اجازة بس
ما نرجع للدراسة تانى:)
لأ شكراً
انا ماشية
خلاص شكراً:)
معقول انتم مش عارفيين حكاية طابا
ماهي طابا دي مسمار جحا اللي كانت اسرائيل عايزه تعمله عندنا
وقعدنا نفاوض ونقاوح ونحكم دولي ونشاكس لحد ما الحمد لله اخدناها من نن عينهم وكانوا بيعيطوا وهمه ماشيين منها
ادي موضوع طابا
انا برضه سالت نفسي نفس السؤال
تحرير طابا؟؟
هو البلد دي كل شوية والتانية تتحجج بحجه وتاخد اجازه!؟
اشمعنى السنادي؟
واشمعنى الطلبلة؟
عموما لما تلاقي اجابات ابقى عرفني,
الا الباشمهندس تمي عاود الاختفاء ليه
ياريت تطمن عليه وتطمنا
وقوله اعقل بقى وارجع وبلاش لعبة الاستغماية دي عرفنا انه محترف فيها
وقوله جماهيرك مستنيااااااااك ومحتاجه وجودك فيهم
معلش بنطلع الغلب فيك انت
يمكن علشان الطلاب فيها -ط-
وطابا برضه فيها -ط-
هههههههههه
@Eng_Romisaa
بس هو حد يقدر برضو يحتل المنصورة ؟
:D
عموما ربنا يكتر من أجازتهم لغاية ما نتخرج وبعدها ربنا يسهلها :)
شكرا لرأيك :)
@ norahaty
شكرا على المعلومة اولا
والغلط غلطي بس اعمل ايه مفيش نتيجة هندنا :D
والحقد دا كان طبيعي طبعا من كل العاملين ,, أمال هنعملوا ايه لما تعرفوا اننا مش بنتعلم حاجة اصلا ؟
تعاطفك لوحده مش كفاية :D
نورتي :)
@ شمس النهار
منا عارف اه
حكولي
بس ياريت تحكيلنا موضوع سينا ,, ولا بلاش خلينا ساكتين أحسن ...
نورتي يافندم :)
@ المجهول
لما اعرف ان شاء الله :)
بالنسبة للباشمهندس تيمي فهو ان شاء الله بكل خير وأكيد هو بيحوم حوالين المكان وان شاء الله يعود بالسلامة
وانا كمان معاكم بدعوه للعودة ,,, عود يا تيمي :)
دعواتكم ليه يا شباب
ربنا يهدينا ويهدي المسلمين :)
@ حسن
هههههههه
ممكن برضو يابو علي
مفيش حاجة بعيدة على ربنا
منور :)
تعاطفك لوحده مش كفاية:D!
لو بأيدى حاجة تانية
قول لى عليها
وانا اعملها
يافندم.
@norahaty
لا خلاص أنا مش فاكر انا كنت بتكلم على ايه أصلا :D
إرسال تعليق