هندسة هندسة

السلام عليكم ورحمة الله وبركاته

بعد فترة طويلة كانت السقالات وريحة الدهانات والجير هي المسيطرة على الاجواء أمام كلية الهندسة ,, الحمد لله تم الأسبوع الماضي الانتهاء من الواجهة الجديدة لكلية الهندسة ,, والمنظر بقى أحسن من الأول والدنيا زي الفل بالذات ان دي المنطقة الرئيسية قدام تل أبيب .

وطبعا بما إن الواحد بيتعب في التعليم حتى بالأمارة المحاضرة اللي حضرتها الأسبوع اللي فات كنت واقف على رجلي ,, وخدوا بالكم انها كلية عملية ..
بس اللي غايظ الواحد بقى ان الكلية أصلا آيلة للسقوط , ومش عارف ايه لازمة انهم يجملوا في واجهة الادارة والكلية من جوا منظرها يقرف ,,
بلاش دي خلينا في المعامل اللي غير مجهزة بالمرة وهتكلم عن القسم بتاعي اللي بيعملوا فيه ترميمات حاليا ,, ولكن برضو اعتقد ملهاش لازمة في الاخر لأن الكلية عايزة تتهد أصلا .
الغريب أكتر إن هندسة المنصورة هي الكلية الوحيدة في جامعة المنصورة اللي محتاجة تطوير بجد لأن كل كليات الجامعة حالتها جيدة ( من ناحية المباني يعني مش حاجة تانية ) .
وأهو على الاقل طالما الجامعة التعليم فيها بايظ كده كده أهو نقعد في مكان نضيف شوية !!
التكاليف اللي الجامعة بتصرفها على المباني الادارية ملهاش مبرر والأولى ان المصارف تتصرف على المدرجات ,, أو حتى على التعليم نفسه بدل من التهريج اللي بيحصل دا وخلى الجامعة مكان لأي حاجة غير التعليم والحدق يفهم بقى .
طيب يصرفوا على المباني الادارية ماشي بس بعد ما يصرفوا على التعليم الأول ,, ولا هو النشاط الفني والرياضي في أسبوع شباب الجامعات اللي بيقولوا صرف 50 مليون أهم من النشاط التعليمي نفسه ؟!!

ملاحظة تانية وهي اني كان قد قٌدر لي الشهر اللي فات وأنا في معرض الكتاب , وبعد انتهاء الزيارة للمعرض ببص لقيت نفسي جوا كلية هندسة القاهرة , لأن الرحلة اللي انا كنت فيها طلبت معاهم يروحوا جنينة الحيوانات وأنا طبعا مش هدخلها لأن الواحد مش ناقص يشوف حيوانات كفاية اللي الواحد بيشوفه .
المهم كنت بدور على مكان أصلي فيه فواحد دلني وقالي ادخل من بوابة المدرسة دي وهتلاقي جامع ..
ببص لقيت نفسي جوا هندسة القاهرة (اللي الراجل مفكرها مدرسة بسلامة نية )
المهم ,, اللي شد انتباهي ان المباني مبنية من أيام الملك ,,, ومع كده حالتها أحسن من مباني جديدة نسبيا اتبنت في الستينات والسبعينات ... وسلملي على الثورة ...

الواجهة القديمةالواجهة الجديدة

الصورة من هندسة القاهرة