والله مش عارف ليه بجد كان نفسي المنتخب يخسر ، والحمد لله امنيتي اتحققت وكمان بالنتيجة اللي اتوقعتها ي ما أنت كريم يارب .
أكيد طبعاً مش عشان أنا دخيل وبكره البلد دي ، كل الحكاية إني شايف إن موضوع الكورة دا زاد عن حده جداً ، وأكيد لو المنتخب كان فاز على انجلترا ولا حتى اتعادل - دا طبعاً عند أم ترتر - مكناش هنبطل بقى أغاني وطنية وإعلانات ، وعيل أهبل تلاقيه ماشي رافع علم مصر ، مع إنه تلاقيه مش عارف مصر دي كام محافظة أصلاً !!
أنا مش ضد مصر بس الحاجة لما تزيد عن حدها لازم تنقلب ضدها ، وكرة القدم كرياضة شئ جميل ومفيد ، بس للي بيمارسها . وأقصد هنا اللي بيمارسها كرياضة مش كمهنة ، لأني بصراحة مش عارف إزاي واحد يقبل على تفسه يبقى اسمه "لعيب" -يا نوغة- ، وتلاقي الواحد منهم بيسلم على ابنه وهو ماشي الصبح ، ويقولوله: " أصل بابا ر ايح يلعب " ويرجع "أصل بابا جه من اللعب"- يا جماعة الجملة مش راكبة على بعضها وربنا !!
مش مهم عموماً هو دا أمر واقع - وأنا مبفكرش أمنعها يعني ولا حاجة- ، لأن الكورة بقت صناعة في العالم كله ، بس عمرها ما بقت مشورع قومي غير في مصر المحروسة ، أمال ايه يابا دا احنا اللي خرمنا الربع جنية وبعدين لحمناه تاني بعد ما بقى ملوش لازمة :))
وطبعاً محدش يقولي أصل الشعب عايز يفرح ومش لاقي حاجة تفرحه ، ومالة يا عم ما يفرح ، بس يفرح بحاجة تستاهل ، يفرح لما مصر تبقى أحسن بلد في الدنيا ، يفرح لما مصر يدخل فيها صناعة جديدة ، يفرح لما مصر تخرج عالم - مش لعيب كورة !! الفرحة اللي بالشكل دا على حال البلد يبقى مش راكب على بعضه ، وأكيد فيه حاجة غلط ، قول حاجات ، والمصيبة إن الناس عارفه كده بس بتداري على خيبتها !
المكسب الكبير فعلاً إننا -ولفترة غير محدودة- مش هنلاقي أغاني وطنية على ماتشتات كورة بعد ما كانت الأغاني الوطنية بتتحط على صور حرب 73 ، وربنا يهدي الجميع ، ويصلح حالك يا مصر :)
-تنبيه : كان لابد من الكلام لأن انشغال الناس بالكرة عن قضايا الأمة ليدمي القلب ، الأقصى في خطر والحرم الإبراهيمي ينتهك ، ونحن مشغولون بماذا ؟ أهذه هي سياسة ظبط النفس - أو قل تمويت النفس -؟!! لكِ الله يا مصر !
4 علقوا عليها:
كلامك مظبوط يا باشمهندس
وانا متفق معاك
بس بجد كان نفسي نفوز
:)
طبيعي كان نفسي مصر تفوز ، بس تفوز بجد :D
منور يا هندسة ، وربنا يعينك في دراستك :)
كلام جميل جدا
و أتفق معاك
هى فعلا رياضة جميلة ,
بس مش عارف ليه فجأة بقت
هدف و طنى, و كمان كانت
سبب فى مشاكل بين دولتين
!!
لا دا موضوع دولتين دا حكاية لوحدة
خلينا في الدولة بتاعتنا ، كفاية بس الهبل اللي بيحصل !!!
ربنا يهدي
إرسال تعليق