أرجوك مولاي !!

..:: أرجــوك مـــولاي ::..

إليك وجّهتُُ يا مولاي آمالي .. فاسمع دُعائي وارحمْ ضَعف أَحوالي
أرجوك مولاي لا نفسي ولا ولدي .. ولا صديقي ولا أهلي ولا مالي
لمّا عرفتك لم أنظر إلى أحد .. فلا الرعيّة أرجوها ولا الوالي
فلا تكلني إلى من ليس يكلؤني .. وكن كفيلي فأنت الكافل الكالي
ولتسقني كأس حب من ودادك يا .. مولاي فهوشرابٌ سلسلٌ حالي
فلا وحقّك ما للقلب من شغفٍ .. إلاّ بحبّك فاشرح لي به بالي
وفيه سلوانُ قلبي عن علائقِهِ .. وسلسبيلي وسلوائِي وسلسالي
أنا الفقير إلى مولاي يرحمني .. إذا تقضّى بِهولِ الموتِ إمهالي
أنا الفقير إلى مولاي يرحمني .. في بطنِ لحدٍ وحيشٍ مظلم خالي
هناكَ لحمي لدودِ القبرِ فاكهةٌ .. والعظم منّي رميمٌ في الثرى بالي
أنا الفقيُر إلى مولاي يرحمني .. يوم القيامة من عُنفٍ وأهوالِ

إنشاد أبو علي

تحديث :

رابط للتحميل المباشر

في عَجَلة , على العَجَلة !!

السلام عليكم ورحمة الله وبركاته

أول أمس الخميس كنت راجع من الكلية من المشروع والساعة حوالي 5 في الحر القائظ دا , المهم سرحت كده من الصهد اللي حواليا وكان نفسي الاقي حاجة اركبها لغاية البيت .

وبما إن أنا انسان رياضي , وبخيل , ومبحبش أركب مواصلات , أي حد بيمشي معايا لازم يتعذب في المشى لغاية ما يبانله أصحاب .
بس بجد الحر كان شديد جدا ," قُلْ نَارُ جَهَنَّمَ أَشَدُّ حَرًّا لَوْ كَانُوا يَفْقَهُونَ" ﴿التوبة: ٨١﴾ أجارنا الله منها وإياكم.
المسافة مش طويلة هي كلها ربع ساعة مشى , بس الحر شديد إلى حد لا يطاق !!

حتى العربية -اللي هي سيارة في اللغة - السيد الوالد مش راضي يخليني أسوقها , أكيد خايف عليها ,مش عليا ,, أنا عارف !!

صراحة افتكرت الدراجة العُفارية بتاعتي -عُفارية عشان بتعفر وراها - ايه دا , هي راحت فين ؟؟,, ينهار ابيض لتكون اتسرقت , انا حاططها في بير السلم من سنة ومطلعتهاش , والحمد لله لما وصلت البيت لقيتها بس في حالة يرثى لها!

وبالأمس نزلت بعد العصر أفلطت العجلة كده
ونفخت اللي فاضي ,
ونظفت اللي متوسخ ,
وزيت اللي معصلج,
بس الصدا ظهر بشكل كبير على التارة الخلفية بالذات , الشبكة ,,
مش مشكلة خالص , المهم لسه بتمشي .

و مع إني بركب عَجَل من زمان يعني وليا حكاية مع العجل والعربيات , واول عجلة جتلي وأنا عندي سنة بالظبط , مش عارف اللي كان مهاديني بيها كان مفكرني مصطفى بوند ولا ايه ؟ !!
والله كانت عَجَلة عجيبة جدا , أنا لسه فاكر شكلها , مع إنها راحت مع اللي راحوا . كانت عَجَلة بيضة بثلاث عجلات , بس مش كوتش , عجلات بلاستيك مكعبرة , ومفرغة ,, عجيبة بكل معنى الكلمة !!
والحمد لله زمن الخوارق وقف عند العجلة العجيبة دي ومجاليش عربية ولا طيارة بعدها ..

نرجع للدراجة العفارية بتاعتي , خدتها بعد ما شغلتها وقعدت ألف شوية في المكان زي ما أكون عيل صغير جاله عجلة جديدة , بالظبط كده !!

و تبقى للمشكلة , هل هقدر أحل المشكلة إني أركب العجلة واروح الكلية , زي ماكنت بعمل أيام الثانوية العامة كده ؟!! وأحل مشكلة الحر
مش عارف أصلا على بوابة الجامعة هيدخلوني أصلا ؟ !


ثم بعد كده هتكون نظرة المجتمع للشاب المجنون أبو نضارة الي رايح الكلية بعجلة دا ايه ؟
هو مش المفروض برضو أدخل بالعربية اللي دادي جايبهالي ؟
ولا ايه ؟ !!


أنا مش عارف إحنا ليه دايما بنخاف من نظرة الناس لينا
مجرد تفكير
وإلى هنا أُوقف التفكير , بؤساً لهذا الإنسان يخشى الناس , ولا يخشى رب الناس !!

المهم بعد كده فكرت إني أحتفل باليوم دا واعمل رحلة على الدراجة العُفارية بعد التجديد ...

هي مش رحلة بمعنى رحلة ولا حاجة ,, بس أنا كنت دايما بقف على كورنيش الزبالة - عفوا كورنيش النيل اللي زي مقلب الزبالة - وابص الناحية التانية الاقي كام بيت وجامع وقبة كده زي ما يكون مقام ولي -من أولياؤهم- والبلد اسمها ميت الكُرما زي ما عرفت .
وكان نفسي اروح الناحية التانية أشوف ايه اللي هناك دا , خصوصا ماذنة الجامع اللي باين انها جميلة , وعالية ..
وكان نفسي بصراحة أقوم بالرحلة دي مع صديقي الصدوق أسامة , بس شكلي كده هعملها لوحدي وعلى دراجتي العفارية

كانت رحلة مثيرة بعض الشئ , وبصراحة استخلصت منها شوية فوائد في مثل هكذا رحلات , فوائد ,,, مرعبة.

• أول حاجة وانت رايح أي حتة بالعَجلة وأنت مش عارفها , تاخد معاك مية شرب , لأنك طول مانت ماشي في الهواء الطلق كده هتعطش , ومنتش عارف ايه الظروف , وأحسن حاجة ممكن تلاقيها ثلاجة مية من اللي هيا عليها قفص حديد دي عشان متتسرقش والكبايات مربوطة بسلسلة , ومكتوب عليها "وسقاهم ربهم شرابا طهورا" , قال يعني الثلاجة دي نزلت من الجنة , مع إن أبسط حاجة ممكن تحصل عليها من ورا الثلاجة دي فيروس الكبد , عفانا الله وإياكم . وربك يسترها.
• ثاني حاجة أوعى تمشي بالليل - حتى لو كنت راجل - لأن لو مطلعش عليك "البطلكية" , هيطلع عليك كلاب السكك , واسأل مجرب ,,,, ياساتر دانا بكره الحيوان دا كره ,,, واعى نفسك الأمارة بالسوء تسولك إن العجلة أسرع من الكلب , واهمٌ أنت يا ولدي ..
  

• ثالثا , خد معاك عدة بسيطة كده , محدش عارف ايه اللي ممكن يحصل ,, ممكن تحتاج مفتاح 10 أو مفك صغير ( كده مبقتش عَجلة , دي عربية )

• رابعا , والأهم , توقع كل ماهو غير متوقع ..
  

المهم صليت المغرب , وعديت كوبري الجامعة , عشان اشوف البلد العجيبة اللي مقابلة لينا دي , نزلت من على سلم الكوبري , ومشيت باتجاه البلدة دي , بصراحة أنا كنت ماشي في دهشة , لأن البلد كانت كبيرة جدا , أنا كنت مفكرها حاجة صغيرة ومقطوعة بس مطلعتش كده خالص , بلدة كبيرة , وفيها خلق كتير وبهائم , ومدارس ومحلات وبقالين وجزارين , وشباب قاعدين في الشارع ومشغلين الموبيلات الصيني دي على أغاني من شاكلة " البانجو مش بتاعي ".,,
طيب ازاي احنا منعرفش حاجة عن البلد دي واحنا قبلهم الناحية المقابلة علطول ؟ هو إحنا ليه مبنعملش علاقات ونبعت سفير من عندنا ويبعتولنا سفير عشان توطيد العلاقات بينا ؟!!!

أنا مصدوم , مع إن من الناحية التانية من النيل -اللي هو فرع دمياط بالمناسبة - مش باين كده والمسافة لا تتعدى ال 200 متر, أنا كنت مفكرها بيتين وعلى قد كده , بس الحقيقة الإنسان ساعات بتكون نظرته قاصرة , ودا أول درس طلعت بيه !

بعد كده فضلت ماشي في البلد دي , وطلعت برضو مش بلد , دول بلدتين جنب بعض , ميت الكُرما و جوجر , لغاية ما وصلت للمأذنة , وكانت صدمة تانية , مش عالية ولاحاجة طلعت أدنى مما تصورت , بس المسجد نفسه في مكان عالي عشان كده باينة من الناحية التانية عالية .

خلاص كده وصلت لآخر البلدة , ورجعت من مكان ما رجعت , والحمد لله متوهتش , لغاية ما وصلت للكوبري تاني , قمت عامل فيها عبيط ومخدتش بالي من السلم , وكملت الناحية التانية لأني كنت شايف نور من بعيد , نور من "طلخا" , وكبرت في دماغي أكمل , وفعلا كملت ناحية طلخا , وقدر الله وما شاء فعل !!

ماشي على الطريق في أراضي زراعية , والمكان مظلم شديد الظلام , المهم لقيت مبني اكتشفت أنه مصنع لتشكيل المعادن , بس المفاجآة إن حصل اللي متوقعتوش ولا عملت حسابه , حاطين كلاب حراسة في الأراضي حول المصنع , طبعا ببص لقيت ورايا كلبين بيجروا بأقصى سرعة , معرفتش أعمل ايه غير إني كنت بجري زي المجنون , دول كلاب مبيهزروش يعني , ياوقعتك يا مصطفى , أجري أجري , ومش عارف هما وقفوا ليه , الظاهر خرجت بره حدود رادراتهم , الحمد لله مكنتش متوقع إني ممكن أخرج منها , كانوا بسهولة جدا ممكن يحصلوني , بس الظاهر إنهم مدربين على كده .

بعد شوية وبعيد عن الكلاب فكرت كده , ايه دا ؟ طيب أنا هرجع من هنا إزاي ؟ معدش ينفع خلاص !!

مفيش غير حل واحد , أكمل لغاية طلخا وارجع على الطريق الأسفلت , وحصل ومشيت لغاية طلخا صليت العشاء, ورجعت من على الطريق الأسفلت مروراً بموقف طلخا الجديد , ومدارس المنصورة كولدج , وبعد شوية قدام توكيل سيارات مشهور , حصل تاني اللي متوقعتوش بجد , كلاب تاني , والمرادي كانوا أقرب , دول كانوا بيجروا جنبي , وأنا طبعا مش عارف أعمل حاجة أكتر من الجري , والحمد لله ربنا سترها برضو وعدت , وتوبة عدت أعملها وامشي في الطريق دا تاني , آه ياعم العمر مش لعبة .

قُلْ مَنْ يُنَجِّيكُمْ مِنْ ظُلُمَاتِ الْبَرِّ وَالْبَحْرِ تَدْعُونَهُ تَضَرُّعًا وَخُفْيَةً لَئِنْ أَنْجَانَا مِنْ هَذِهِ لَنَكُونَنَّ مِنَ الشَّاكِرِينَ (63) قُلِ اللَّهُ يُنَجِّيكُمْ مِنْهَا وَمِنْ كُلِّ كَرْبٍ ثُمَّ أَنْتُمْ تُشْرِكُونَ (64) قُلْ هُوَ الْقَادِرُ عَلَىٰ أَنْ يَبْعَثَ عَلَيْكُمْ عَذَابًا مِنْ فَوْقِكُمْ أَوْ مِنْ تَحْتِ أَرْجُلِكُمْ أَوْ يَلْبِسَكُمْ شِيَعًا وَيُذِيقَ بَعْضَكُمْ بَأْسَ بَعْضٍ ۗ انْظُرْ كَيْفَ نُصَرِّفُ الْآيَاتِ لَعَلَّهُمْ يَفْقَهُونَ (65) - سورة الأنعام


بس كده , دا ملخص الرحلة المرعبة اللي قمت بيها ,, وإن كنت ناوي أعمل واحدة تانية في ناحية تانية النهاردة بس بالنهار قبل المغرب بقى .

وربك يسترها ...

دا كان حكايتي مع العَجلة , في عَجَلة ..
أستودعكم الله , محدش عارف العَجلة هتعمل فيا ايه النهاردة .

ودي خريطة للمكان على الماشي ,,,


سلام ,,,

ـ علشان ( نفلح ) لازم ( نقلع ) !! ـ (نقلا عن تظبيط)

نقلا عن مدونة >>تــظــبــيــط<<

رابط الموضوع الأصلي من هنا

والآن ننتقل للإذاعة الخارجية

احم احم

^^^^^^

كان يا ماكان ,
في ( حاضر ) العصر و الأوان ,

كثرت حوادث السرقة و ( التثبيت ) ,
و كَثُرَ البلطجية ولاد ( ستين تيت ) ,

و كان البلطجية و ( الحراميين ) ,
بيخبوا المطاوي و السكاكين ,
تحت الهدوم في مكان أمين ,

و لما الحرامي يقترب من الضحية ,
يطلع السكينة المستخبية ,
و يهدد , و يسرق , و تنتهي العملية ,

و بعد البحث و التمحيص ,
و الفحص و ( التفعيص ) ,

توصل السيد ( المحروس ) ,
المتحضر ( المُسأَّف ) صاحب الفلوس
لحل ما يوصل له بقر و لا جاموس !!

قال لك : سيبنا من ( تقاليد ) الأمس و هنبدا من اليوم ,
نمشّي الناس في الشارع من غير هدوم ,

و بكده لا هيقدر قُرَني و لا عَطوة
يخبّي في هدومة سكينة و لا مَطْوة

و هنعيش في سلام و أمان ,
و يبقى منظرنا ( متحضر ) و آخر جنان ,
و طالما ( قَلَعْنا ) يبقى أكيد هنطلع القمر كمان !!

...........


ملحوظة :
ما حدش يستغرب من القصة و الحل الذكي ده , لأني لسه سامع حل ذكي من أحد ( المُسأّفين ) بيقول : إننا لازم نمنع النقاب علشان نمنع المجرمين من التخفي في هذا الزي !! و كأن أساس المشكلة قد انتقل من مطاردة المجرم إلى مطاردة الزي الذي ( يُظن ) أن ( بعضهم ) قد يتخفى فيه !!! متهيأ لي برضه لازم يمنعوا الصعاية من التلفيعه بالعمامة , و يمنعوا الناس تلبس نظارة شمس مع كاب على راسهم , و بالمرة فيه مجرمين بينتحلوا صفة ظابط شرطة و يسرق أو ينصب على الناس بلبس الشرطة , أنا بقول برضه يمنعوا الشرطة من لبسهم علشان فيه بعض المجرمين بيتخفوا فيه !!! . . . . .
الحمد لله الذي عافا عقولنا من العفن الذي أصاب عقولهم

*`'_______________________________________________________________________'`*

ولا حول ولا قوة إلا بالله


بسم الله الرحمن الرحيم

إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنْتُمْ لَا تَعْلَمُونَ ﴿النور: ١٩﴾